ELAI-ALAI: Dantza eta Musika Eskola tradizionala

Dantza eta musika tradizionalaren ikastegia 2004ko ekainean sortu zen, Elai-Alai taldeko hainbat eta hainbat kidek aurreko urteetan egindako lanari esker.

Aspaldi konturatu ginen dantza tradizionalak hutsune asko dituela. Beti amateur gisako jardueratzat jo izan da. Hori dela eta, gure ohituren alde jarduten duten gehienek ez ohi dute ibilbide luzea izaten, eta, hartara, ezagutza eskaseko jendearengana jo beharra izaten da.

Honelako ekimenen bidez prestakuntzaren kalitatea hobetu egiten delakoan gaude Tradizioaren Kulturgunean. Dantza eta musika tradizionala herriak eta herriarentzat sortuak dira, bai, baina ezin dugu ahaztu lana ahalik eta duinen egin behar dugula beti.

Irakaskuntza profesionalaren xedea gure sustraiei begira berriz heztea da, dantzariak, artisauak, etab. sortzeko, amateur gisako irakaskuntzaren aldean, jarraitasun luzeagoaz.

Egunero areago sartzen gaitu gure gizarteak irabazi asmoa nagusi den kulturan, eta, hortaz, ahaztu egiten dugu zerk ematen digun nortasuna, hots, garena eta izango garena.